شدوني على كلمة
شدوني على كلمة مَشي دْيالي مَشي مني
خرجات من فمي صغيرة وف الحين كبرات
و دلْعات حتى غطات عين الشمس و سرحاتْ
كلمة سْتاتْ حروفها فاش كان عقلي ساهي
لقطاتهم واحد ورا(ء) الثاني من جوطية الكلام
اختارت المعلال والغضبان و البراني، بلعاني
نسات الخير اللي سكيتُه لها ب الحفاني
و سافرات ف حلقي تتخبى ف الشقوق
و ظلام الحفاري و تتنكر تحت لوان المعاني
حتى لْقْات الوَجْبَة المْحَجْبَة على فهامتي
و خرجات
و خرجات عْليَ
شدوني على كلمة هي مني و أنا منها با ري
فمي محلول ما جايب اخبار معري
كلمة مكلمة مكملة ما ملثمة ما مسلمة
تغامزوا عليها لْقلام اللي مدادهم مفضوح
رحبوا بها لْوراق اللي صوت الغدر فيهم
عمرُه ما عَفْ ولا كَفْ حتى وَلّى مَبْحُوح
كيف نردها عندي بعدما هجرات
و حروف كلامي عْليَ تعوجات
و صْغَر شاني ف سوق كلامي
و دخلت جْوايا بْلَا هْوايا وتْقلْبَتْ الدواية
عْليَ
وعلى قْلْاَمي
شدوني على كلمة و سدوا علي باب السؤال
كيف نَحْيي مْواسم الثقة الحاضنة كلامي
مْنين نْجيب وْجيبَة و نجلس قٌدَامي
و نْشُفْني باكي ونَزَل على رْكابي و بايسْ قْدْاَمي
و وخدني ف احضاني
أنا نية وعلى قَدْ أحلامي
ما نعرف نقلد الحوت ماشي ف الما(ء)
ولا عايم ف الصابون البلدي
شدوني على كلمة صغيرة
ما يحس بها مهراز الهضرة و لا يدُه
إلى زارَتْ ميزان لكلام من خَفْتْها تْهَرُه
بايرة عل لْعْبار ناكْرنْها صْرُوفُهُ
حاسَبْتْ قلبي و تَقْلَبْ عْليَ و قْلَبْ مْيازْني
هو اللي هاز هْبالي و هابط به...
مَرّة يقفزُو مرة يَكْميه باش يَسْتَرْني
نهار غَّسّالي يفضحني و يَعْرّيه
جريت ل لْسَاني... لسانُه اللي سكت وهجاني
و حلف ب عظمُه اللي رشّاه الكلام حتى سال ريوك
ب اللي مادار ب يدُه ما تندم عليه يدُه
سولت فمي عن سْبأب همي
كيف سمح ل حريفات يعوموا ضد تياري
و يسقيوه الندامة حتى غرقوني ف حشومْتي
كيف خلاهم يتخطاوْ حدود الشوارب و يغنيوْ:
" يموت العلام وتحيى
السربة
بلا لجام"
شدوني على كلمة و كتفوني ب الشمتة
أنا اللي حْسَبْتني عوام ف القوافي
و زين الحروف كنلاقي
و الصغير ف الكلام كنعلمُه الكتبة
و كيف يقْرَأ ب لْمَقْلوب
و الكْبير نزوجُه و نْديرني قابْلَة
ونْحضن وْلادُه بلا كذوب
و ملي نعطيه الأمان... كيعطيني الصبر
حتى نغفل و يشعل النار... ف قشابتي الفازكة
حتى نتعرى ويمسخ جلدي... ونولي ضحكة يابسة
ف عين المَكْسي ب الخوا
شدوني على كلمة أنا نكرها
باش عرفوا بلي هي كلمتي مَلْكي ؟
ما عليها وشام ولا رشم ولا بصمة
غدي نقطع لساني و نوهب سناني و نخيط الشوارب
و نركب سكاتي و نْسَري
حيت كلمة ب كلمة كتحمل الهضرة و تولد بذرة
و ترضعها حليب البَكْيَة المنسم ب دموع الضحكة
و سكات الغضبة
و فاش "كتبلغ"... المعنى
كتهرب على ظهر الريق الصايل
و كتدير الزبايل.
سرحاني أكتوبر 13
الرئيسية 
