التوكِيضة

موضوع: التوكِيضة 2013-10-21, 10:40

التوكِيضة

نخرجني من راسي

ونضحك عليا

شحال فيك النية

حدْ ما دار فيك مْزية

نشوفني كتاب مفتوح

كولشي يقراني

والناس كتوب مغلفة

ما تقرافيها الليف م لباء

بغيتني يتبدل حالي

ونْولي آخر

ياخذ بلا ما يشاور

ينهى ويأمر

ولْكل ليلو مْساير

ما يهم محبة ولّى خوف

ما يهم الضحكة

م لقلب ولّى م لجوف

نديرني ما نفهم

غير نسمع ونتمتم

غير نجمع ونلم

ما يهمني حدْ ولا أمر

نْركب ليا وجوه جداد

مسايرة لوقت والزمان

عايشة كل نهار ب ألوان

على حساب السما والظلمة

على حساب لوقت ولخدمة

على حساب لقلب وما تمَّ

المهم نلقاني مرتاح

نداوي ب غباوتي لجراح

نفيق راشقة ليا كل صباح

هكذا بغاها الزمان لمكْلوب

اللي صبح كلو عيوب

مارحمت لقلوب

صارت تقلب عل السبوب

وغرقت الناس ف الذنوب

بغيتني نساير لوقت

وهكذا نكون

حية تغير جلدها كل يوم

في بحر لكلام تعوم

تكُول انا شديت بيدي النجوم

شفت شلى احلام ف النوم

وزيد وْزيد م خبار ليوم

راسي جبو حالو

وخّى كثر هبالو

وكثير م الناس بحالو

فْ لحظة..

راسي طرش راسو

طلق عليه نارو

مسح جلالة عينيه

وطيرو لو غبارو

وزن ليه عيار عارو

شحال لقاه ثقيل

مَ لخير قليل

وقلبو سقيم وعليل

ذكرو ب الدنيا لفانية

عَمَّر ماتكون دايمة

بنادم فيها ضيف راحل

ما يفلح غير الى كان عاقل

يوم يقرا كتابو قدام لعادل

س/أ/غ 20/10/2013

موضوع: رد: التوكِيضة 2013-10-21, 20:33

الله يخليك ديما راشقة ليك
ومشاية النزاهة لابسة رجليك
خيط الصباخ يتغزل بين يديك
يفيق التاعس بصياح الديك ..
*******
دوما كلماتك مقبولة لدي ....لوضوح الصورة الشعرية فيها والإنزياحات غير المبهمة فيها ولثقافة منطقة الغربية فيها ..شكرا لك ..

موضوع: رد: التوكِيضة 2013-10-22, 09:32

حميد يعقوبي كتب:: الله يخليك ديما راشقة ليك
ومشاية النزاهة لابسة رجليك
خيط الصباخ يتغزل بين يديك
يفيق التاعس بصياح الديك ..
*******
دوما كلماتك مقبولة لدي ....لوضوح الصورة الشعرية فيها والإنزياحات غير المبهمة فيها ولثقافة منطقة الغربية فيها ..شكرا لك ..

بورك فيك سيدي وفي كلامك وتشجيعاتك