عبد العزيز سرحاني
عدد المساهمات : 116
تاريخ التسجيل : 10/05/2013
 | | موضوع: تحصل...تحصل ! 2013-10-21, 05:01 | |
| تحصل...تحصل ! قالت شنيولة : أنا الناموسة خْفيفْة اللمسة و ثقيلة البوسة كنروح عاتقْ عند زماني عروسة، النهار حاجبة، على الشوف غاضبة الليل محزمة و بالرعشة مرزمة مبيا جوع و لا بَلْية غير الغرام الصادق و المحبة بالنية نتلحف الظلام هزيلة مدبالة نْخَبي ذاتي ف شريط حياتي الممسوح قَدَر قَوْمي والسُلالة نفرش هيدورتْ سْلامتي و نحضيك حتى تْمَد حتى تَسهى حتى يجيك النعاس ب موسو و يقصص عويدات شقاك و يَدرحهم براحة البال و تَبْرم ف نيبْرُوكْ و تشعل و تنشر دخانك سحابة ثقيلة ويرعَد شخيرك و يبرق سَنك وتسيل شتا فمك على جنانات حنكك الناعس وتروي وسادتك اللي ك تبات ضاية وتصبح غيس شحال تسنيت و تسنيت و مسافة حياتي عُمر نسمة حتى عرقتي و هجرتي الفوضى د غطاك ... و تعريتي ضوا لونك طفا خوفي فاض لحمك على وادو و تبهدلتي المحبة هيجتي وطفيتي الصبر اللي كان ضاوي ف ضلام الكايلة وتْسَرجتْ على ضهر شهوتي وحليت جناحي وسديت عيني باش تهنيني من صورة الميت العايمة فرماد عينيك المقلوبة، و نزلت فوق بحر صدرك و تماوجت بماجو نطلع حتى نرتاح نهبط حتى نخاف و فرحتي سفينتي مْبَحْرا بيَا أنا وحبيبي خيزْران معانق ف رقصة رومية نوطات قلبو تعزفها صبعانو ل يديا شعر سدرو مع سوالفي تخبلو وهو ك يدور بيَا صافي ... تْصَفا صبري بارت الحشومة نباشرك و نحيد اللومة منين نبداك فين نغطس و نبد العومة و أنت كومة كلها شحمة ؟ و شفت سارية عنقك جميل رخامي ترخاو لشوفتو عظامي مزينو عقْد د لعروق منبت بنجوم الرغبة الساطعة ك قطرات الندى اللي كتندى وتذوب ف يد العطشانة بحالي اختاريت واحد و لمستو بيدياَ شميت ريحت عصير الحياة فايحة قوية وعنقت عنقك و ترخيتي و حسبتك بغيتي و فتحتي عيون جلدك لشوكتي اللي دخلتها فيك شوية ب شوية حتى غطست حتى غبرت حتى دموع النشوة نضحو وفضحو ليعتي وبديت نشرب نشرب دمك حلو أنت الساقي أنت كاسي أنت فراشي و أنت نعاسي دمك عسل بديت نسكر و بديت نحلم نسيت راسي نسيتيني فيه و نسيتو ب مرة و أنا كنشربك و أنت ك تنين ... علاش بدلتي نعاسك فياق و لاش الضو لاش فضحتيني خلي الضلام يضوي عشنا و يشعل الأحلام ف دمنا المشروك علاش بدلتي حلاوتك مرار كيف نهرب جهدي تغلب... دم الغير ثقيل وخا يكون خليل م قدراش نطير علاش ف يديك النعالة ؟ بالزربة بدلتي اللغة و كحلتي شوفتك ب الغدر علاش يديك مرفوعة ؟ ألا ألا ألا ... سرحاني عبد العزيز يونيو2013 | |
|
