طلة من باب الرج
طليت من باب الرج
ولقيت كفي سابقني
يطلب سويعات الهن
تعود للديارمسكدة
وجراح الخاطر تلحم
وتروى القلوب بالدف
...
حيرتني ديك الكلسة
جنب الحيط
وبسمة طالة حشمانة
من وجع الدنيا دبلات
والزمان على الخد
شقوقو بانت
مسطرة بحكايات
كل سطر بنبرة
حكرة ..
فقر.ز
وشدة فشباك الصبر
الحال عصر
وريقو نشف من صهد الوقت
وعلة الحازمينا وتر
كل يوم لحن جديد
وغناية عليه تردح
غاب الفرح فزحمة لقراح
المحكنة فالقسمة
سقي وزيد سقي .
...
حيرتني ديك الطفلة
وعيون طالة من شباك
تسرق حبات العشق
ولهفة جارة الوقت
من ظفيرتها
توريلها الويل فعنين الطفلة
وشوفة الغول
المهبول عل لشفار
وليلة ظلمة
يتشهى ما يبرى
لحم الوقت ...
والطفلة هازة
فوك كتافها
حمل ثقيل
والسايك ما يعرف رحمة .
...
شهمتني وراق
عامرة كتبة
ومذهبة
فيها رواح
تعكرت بكري
وسحقها طول الطريق
والمشية حالت بين الرجلين
زحفت ما بغات توقف
حتى عافت المشي
فدروب النكسة .
الورقة الخط فيها عواج
والحرف خرف
من ليعة الشدة
وزحمة الوراق .
كلشي باقي يحصد
من شوك الكية
حرقة مروية بكذوب الهضرة .
واش يمكن
تصف المياه الجاية فالواد
وكل يوم حملة
واش يمكن ربيعنا يخضار
من غير شتا
تغسل يامنا
من غبرة حايلة فالقلوب
وزلت المكتوب فدفاتر
محسوب علينا
وحنا منو مبريين
ما جا علينا
ما جا قدنا
ما لقينا حالنا فيه
واش يمكن نهارنا
يطلع من غلب الليل
القاسي بظلامو.
سولني انا ونسولك
حسبنا ليام الفايتة
ما غلطنا فالحساب
كل يوم زفرة
تعري الباقي فينا من الصبر .
سولني أنا ونسولك
كيف تسطرات الحروف فعيونا
بجرة لقلام الكحلة
وكحالت علينا من نهار جينا
تعقل ملي كنا صغار
تعرينا من وسخ الدنيا
وليوم جاو لبسونا هموم بايتة فينا
ثقلات ع القلوب
وكرفات حروفنا بالشدة
زبرونا
ولقمونا بالسكات
وكبرت لغصان بل غلة
والزمان تخلى علينا فكفوف
تقطع من الجدر
المخير فينا .
واسني ونواسيك
يمكن الكلمة تولد غيرنا
يتجبل عل كولة لا
يعرف يختار طريكو فالصحرا
واسني ونواسيك
را يامنا عمات
من فلتة الريح
الصايطة لهوال رمل
ودركتنا واقفين فالعتبة
مزال ما بدينا
الخطوة تكلعت من يدينا
كيف اللقمة
ما لقات طريقها لجوعنا
تخفف عليه الشق
والحاجة اللي م قومات ريح د الزمان .
واه يا خوي واه
حوز علي
ونحوز عليك
يمكن يتقوى عودنا باللمة
يمكن صباحنا يقبل الشمس
براسو معري
حوز علي وروملي
راني توحشت أنت
توحشت أنت
توحشت هو
توحشت هي
توحشت راسي
توحشت عينيا
توحشت كلشي فيا .
أحياني أحياني
جبدتني الحروف
ولاحتني فغيسة
خنزطينها
ما بق ينفع لبني
ول للعب الدراري
وانا ماسخيت بلرسام
جابتني النوبة
يمكن تنفع الجدبة
يمكن ينفع الهيت
يمكن ينفع المزوكي
يمكن ويمكن ...
حلمنا زاد
من بعد الغوتة
ما سمعنا صوتو
تزيزن
وطفات شمعتو
ما سبع كيف الصبيان
اللي تولدت فرحاب الحق
لهيه ماشي هنا
ما شاف ما تشاف
ما عرف منين يدوز للعشق
والعشق غريب فديارنا
يمكن ليوم نتافقو
والحرف وطن
يجمع لكلام بكل لوان
ونعاودو الكتبة
المغزولة بصوف كحلة
ندزو غير البيضة
ونغسلوها مليح بكفوف الحق
شتيف وعتيف
ونفتلوها بمشاط
تكلع الخبيثة ويزيان الحرف
ونغزلو لكلام الصافي
بالولف ونسديوه بالمحبة
والمنسج رحبة
يبغي غير الصافي من لكلام
يطلع ضاوي
بالنظرة
بالمعنى
فراش الضايعين
فراش المحرومين
من حق الكلمة المبتورة
فلسان الحق
وراني ما نسيت هم الخاوة
ما نسيت دفاتر الصحبة
وكرم الدوالي
مانسيت حتى شي
غير أوكان تكسرت الصورة
بيدين خبيثة
وعقلي ماطاوعني
وراني نرتق اللي بق من الحروف
يمكن تطلع القصيدة
بروح جديدة
ويفيض العشق
يسقي يامنا بدم حار
يحرك الساكنة فينا
ويفيق لفكار
يمكن ويمكن...
يمكن نعيشو إلى قالونا
من دريز الساسة
اللي ساسونا
حتى تفرقات لغصان
والشجرة وحدة
والغلة وحدة
وعلاش علينا
وحنا فيها كاملين
يا جنة تلمنا
يا نار تحركنا بلهيبها
شكون المخير فينا
يفتي ويكول عيينا
عيينا من ضرب المحال
عيينا من القيل والقال
عيينا من وعود زاحفة
ركبت العكز فينا
وعلاش علينا
ووراقنا حتى هي زينة
فسواق الربح
تابعين كي القطيع فالغابة
تابع ملاه
وراه وراه
ديما يبقى مراه
يسرح كيف بغ
يدبح كيف بغ
ديما مراه
وعلاش علينا
وجناينا حبلى بالخير
كيف ديما تجيب
غلة تطفي جوعنا
وتسرق الشقا من يدينا
ومالنا كاع إلى شقينا
بصح الغلة تعود علينا جميع
وتتساوى البروج
والسعد يرجع بزهو الخاطر
ويا سعدي إلى زيانت الكعدة
فمراح البيت
والدار لكبيرة
وخبزنا يطيب على يدينا
سولني نكولك شحال
شحال هادي وأنا نتسنى
نفيق من الراكبني
ونسلت مني لأنا
اللي عرفتو هادي شحال
وتجي انت
ونتلقاو فأحضان الخيمة
يتبدد الخوف
يتشتت الهم
وكيسان البهج
بالرزة فوق الروس
والعقل مهووس بحبك يا بلادي
انت يا بلادي..
واه يا بلادي ..
يا الساكنة فحرفي
ياالساكنة فعيني
بيك تطلق صرح الكلام
بيك رسمت القصايد
ورتبت لفكار
واه يا بلادي
وانت باهية
وانت زاهية
إلى بغاو ناس الحال
يمسحو لواح المحال
ونكتبو حكايتنا بلون مبدل
لون بلادي اللي ما بحالو لون .
عبدالعالي الوالي 2013/09/30
الرئيسية 
