مــولات الــخــــال

موضوع: مــولات الــخــــال 2013-10-09, 10:08

مــولات الــخــــال

يا ناس ، يا أصحاب لعقول
لا تشتمو ف هذاك المهبول
يلا عواج ف المشي و القول
الدنيا غرارة ف العرض والطول
* * *
المهبول كان عاقل وفصيح
ف العلم ، ما كان بحالو لحيح
أ ف الجهد قوي و صحيح
أ ف رزقو كريم ماشي شحيح
* * *
سبابو امرأة زينة و شهبة
من نهار تخطى هذيك العتبة
لقراية ما بقات عندو رطبة
أ بين قرانو ما بقاتلو رقبة
* * *
ما بقي حافظ ما ف كتابو
ولا عارف حساب ف قرابو
غريب ولي بين كل حبابو
اللفعة مولات الخال سبابو
* * *
البارح ، عشقها و عشقاتو
ظنها ف العشرة وتاتو
من بعدما بلسانها سلباتو
وقالت لو بالحب عشقاتو
* * *
وحيث خوات مخ عظامو
ف ضعفو و ف غيرعلامو
عظاتو ب ناب الثعبان و سمو
أ رماتو للزنقة جاهل كلامو
* * *
حروف كتبهوم سبقو سيرتو
مالو و جهدو زينو لها صرتو
لعشق والثيقة عماو بصيرتو
النية والصدق زادو حيرتو
* * *
الحب ، ف الرخفة و الصحة، عناية
أ ف الشدة والمرض غير شفاية
بنت الناس ، ما محتاجة وصاية
تتزين بلفعال أحسن من الحناية
* * *
دخيلك يا الشافي من كل أضرار
برسولك محمد و بحالو لحرار
تبعد على عبدك حميد لشرار
و تجود عليه بحلة من تاع لبرار

حـمـيـد الـصـنـهـاجــي
الثلاثاء 8 أكتوبر 2013