لبرڭي ف الخيل

موضوع: لبرڭي ف الخيل 2013-09-23, 04:55

لْبَرڭي فَ الخَيْلْ
نَقّي عَلْفو
إلى حْرَنْ رَيْضُو
ولْبَرْڭي فينا
إلى تْكَلَّمْ طَرْفو
مَنْ لْسانو ڭيْدُو
لبرڭي ف الخَيلْ
بَ سْناحو كَلْفو
إلى حْفَرْ وَرْدُو
ولبرڭي فينا
حَلْقو شَحْفو
وإلى سْخَنْ بَرْدُو
لبرڭي ف الخيل
الوَقْفَة تْشَرْفو
وإلى حَنْحَنْ جَرْدو
ولبرڭي فينا
خْيالو صَرْفو
فَ الكَسْكاسْ صَهْدو
************
لبرڭي ف الخيل
بْ ضَوْ الڭمْرَة طْلَعْ
عَلْ الخَيْمَة
رْكيزَة تَوْقَفْ
فَ سْوادْها رْكَعْ
زاهي فَ قْشورْ اللِّيلْ
مْسَوَّكْ الظَّلْمَة
بَ سْنانْها تَذْرَفْ
نْجومْ فْ عَيْنيهْ تَقْبَعْ
دَمْعَةْ لَخْليلْ
عَلْ الخَدْ حَكْمَة
***********
ولبرڭي فينا
خْيالو بْهيمَة
رْبيعو خْرَفْ
فْ ظَلّو طْمَعْ
طْلَقْ سْلاڭو
تْشَمْ حْراڭو
فَ التَّلْقيمَة
نهارُو نْزَفْ
فْ ليلو وْقَعْ
تَسْمَعْ تَعْواڭو
غَرْزَتْ نْياڭو
شَا التَّوْحيمَة
سْلاڭو تَشْتَفْ
مَنّو تَّخْلَعْ
تْقَطَّعْ عْلاڭو
تْحَلاّتْ التَّحْزيمَة
لْسانو رْجَفْ
حْروفو تَخْمَعْ
كْواها بَ زْلاڭو

وفُمّو ماجَمْعاتو الشْكيمَة