آشْ هاذْ الحَالَة ؟

---

آشْ هاذْ الحالة؟

ما تْعاشْر 
مْنْ وَالَى
سْتِي فالناس
وأْعزْل الحْتالة

ناسْ معْدنْهم ثْمين
فْضّْتْهم هْبَّالة
ناسْ فُوضَتْهُم 
مْوْرثَة قْرْبالة

عْلاَهْ غِير من والا
أَجي آسِّي
أَجي ألَالَّة

ماتقول زين 
حتى تَرْضى الأُم 
وتْفْتَخر الخالة 

اللي فاتك بليلة
راه فاتك بْشْلَّى
قالوها اللْوَالَى
 
بالفهامة وبالحيلة
ماشي بالكثرة
وانما تدبير القلة

والسر فالساكن
تكون ڤيلا
اولَّا  نوالة

هاذي رسالة
اشحال من واحد
ناسو كانت عليه عْوَّالة
وهو عليهم تْعالى

من بعدما 
كان الفوق نزل
جمع وطوى وسالى

ولَّات ناسو 
عليه ولوالة
 تقول لاحولا
آشْ هاذْ الحالة؟

جميلة جبوري
26/06/2013

السعدية الفاتحي لالا يا لالا
اوا النجمة نيت عوالا
يوم بعد يوم يتوالا
فسماها راها تلالا
بكليماتكم هي ف صعود ما ناويا نزالا
تتردد :يا ربي تحفظ ليا جميع الزجالا
نسا كانو او رجالا