شكون انا
انا لبلية لمجلية ف سما
دايرة كبة معزبة ف لما
جامعة حيش وريش
وساقية لحشيش
وتدي وتجي ف لخيوط
وتعمر لكفا
وطالفا لولفا
شكون ان
انا لموج اضارب من بعيد
جاب الشجر
وجامع لحجر
طوب وصخر
ويتنهد ويكفر
وتنوض علة
دايرة ظلة
فوق اسحاب
وتمشط لضباب
بحروف رجليها
شكون ان
انا لفريك
لي جا ونسى
سميتو من دوا
قرا وتقرا
من كثرة لهضرة
سمح ف لوطا
وعبش ف لعلا
جابو لترابو
منو تروى
شكون انا
انا ارضى لمرشي
بغا كلشي
ونطح بكرون
لويل
وشرب عيب طويل
دار عينين
ورجلين
وكمل بطراف ازمان
وحام عل لويدان
يجغم بلعرام
كلام
وحصيصة عام
ودام
عفنو ف راسو
يدور ف عينيه
ودابو ف راسو
شكون انا
انا لحيا
لي قراو عليه
لوالا في كتاب وتصدا
نيت ف كاعة وكدا
ترش بدموع لويل
قطع من كمو
يستر همو
وشكى
وبكى
عل نجوم
وخوى سراب لهم
ف حلاب عدم
يحز
ويكمد
ودار حجاب حديد
ف ربيع كبة جديد
وبنى قبة
ببياض ثلج
وعلق علام
من زجاج مغمام
بجميع لوان
نشر وراقو
ف ظلام الليل
وسرح ف طريق
لي داتو وجاتو
راه لخيط طويل
ولحيا سارح
ما جا
ومانجا
من
عديانو
حلفو يجروه
يغطسوه
ف رماد فازك
يعيا ما يزاوك
لا كبدة مفرشة
ولا قلب هشا
لي رشا
ودار نقشة
ف خرزة لودن
ويتباهى
راه لويل معشش
غاس وما طلع
من كف لسكع
تفرش وركع
وتاه ف جنان ضبع
شكون انا
انا لكلمة
طالقة جوانحها
ف فراش الارض
ف خيوط محبكة
واشمة نجمة
بين عينيها
جمعت لوقفة
وهزت قراب اساعة
تعلم لكبار واصغار
حروف مدمعة
وحلو ف ادلو
مدجلي ف بير عامر وتكوى
جات تتنفسو
هاج وتخوى
وبقى يكر
عل لي سكنو وراحو
وحشهم ف قاعو ما زاحو
رشى وهشى
سلم ساروت لعشة
ومشى
فين مشاو لي سبقونا
.
.
.
.
.
.
.
.
مازال ف الجرة
ما يتقال
لقصيدة عندها تتمة .........ان شاء الله تعجبكم
السعدية الفاتحي
الرئيسية 
