الزهر
الصبعان داليد اليسرية
قرروا وقفة احتجاجية
مبعد اجتماعات سرية
حتى حد ما اسمع لشكاهم
ولا رفق لحالهم
حتى فرصة ما تعطات لهم
باش يكولو ريهم
ملفهم المطلبي سمين
بكلام ما سمعوه ودنين
وحكايات مطمورة فكدور
مالمحاتها عنين
طالعة منها ريحت الحكرة
بحال ريحت القير والصدى
خمسة وخموس
وكمرات وشموس
على الصبعان بخمسة
لحم ودم ولمسة
الغضبة علاش
وعلاش التعوبيسة
عياهم الزمان والتسويفة
تسناو إشارة
من الفوق أو لتحت
ماشافو عبارة
مقصودة أو نعت
عمر اليد اليسرية
ما حلمت بالهمة
ديال اليد اليمنية
لا بالكذوب ولا بالنية
شكون لي كايبد السلام
شكون لي كيقيس الطعام
شكون اللول فالغسيل
فالوضوء الصغير ولا الكبير
حتى فسلام العسكري والعساس
كتقاد اليمنية مع الراس
وعند الصلاة وخروج الروح
أش من صبع كيبوح
بالشهادة من غير السبابة
وفالسيارة اليمنية
قاضية حاجة
كتنزه فكل جهة
واليد اليسرية
مزيرة حدا الباب منسية
مكتخدم موسيقى دالوجبة
مكتقاد مرايا عوجة
مكتسد صمطا مجنبة
مكتديماري مكتسكات
مكتهز فران مكتهبط
مكتليق غير كالة
وحالتها ديما حالة
إما كتخمل فالزبالة
أو كتنقي العفن والرذالة
من القنوت المعلالة
كتمشي للظلام محتالة
باش تحك كالقرشالة
ياه
كتبكي اليسرية مدبالة
رفاكتي مذلالة
وخا كيزينوني بالمكنة
وبشتا خواتم ملونة
دالزواج أو الخطوبة
وكايمنيوهوم بالزربة
مبعد كل غضبة
طلاق أو تعصيبة
ودبا فهمت علاش هد الحالة
كاين اللي خلقوا الله وسهلوا المسألة
عمروا على الناس ميبقى عالة
حاجتوا مقضية
فالصباح وفالعشية
هو المرضي
هو المهدي
هو القاري
هو القدام
هو المقدام
هو الناجح
هو الرابح
هو الغزال
هو الهلال
ديال العيد
وكل عيد
وكاين لي خلقوا الله لتمارة
الناس لصحبتو ركالة
حاجتو مجلية
مطوية منسية
كالصباح كالركبية
هو المسخوط
هو المزلوط
هو الجاهل
هو اللور
هو المعلول
هو الخاسر
هو الضاسر
هو الخايب
هو العايب
هو الضلام
ديال الليل
وكل ليل .
الرئيسية 