حسيني عثمان في نص : خِيرْ وسْلاَمْ .................................................

خِيرْ وسْلاَمْ

يا هْلي يا هلْ لمكان
يا السّالبين عقلي من زمان
يا العابرين الكلام ف لساني
بلا ميزان
يا المطوعين الحرف الكادي
بلا نيران
يا المزندين ف دواخلي العوافي
بلا دخان
هذ حديث طويل ما فيه كلام
حفر الخاطر دار فيه وشام .
فرزّو معايا هذ المنام
وقولو خير وسلام .
***
شفت راسي ف السما
طاير ...
ب جناح مكسور وقلب مفطور
نذاعب لغيام،
ب حال محكور وحرف معصور
نرشّم لكلام،
ب دراع المغدور نطلع فوق السور
نهز لعلام،
ب روح جيكور* نقطع لبحور
ونرسم لحلام.

يا هلي يا هل المعاني
فرزو معايا هذ المنام
وقولو خير وسلام .
***
شفت راسي نجمة
سارقة الضحكة
من ظلام الليل،
نلملم جراح
العشق
ونداوي القلب العليل .

شفت راسي نغمة
ساكنة ب لحنها
اوتار القلوب،
تاخد العقل
وتخلي الخاطر مسلوب .

شفت راسي كلمة
تزيّن ب حروفها
تاج المعاني،
تجلي ذاك الهم
اللي ما هناك ولا هناني .

شفت راسي بسمة
مرسومة على شفاه
المضيوم،
نشعل شمعة نمسح دمعة
جفات العيون
وطيرت النوم .

شفت راسي حكمة
ورثوني لجيال
عكاز ف الطريق
وتفجيجة ف الضيق
الله يرحم من قال .

شفت راسي وشمة
بدم لحرار مرسومة
نسكن صرح اللوح
اللي بنيته نتما .

شفت راسي حلمة
نبني الطايح من الرسام
نرثي حالي وحالك
ف الظلام .

يا هلي يا هل المعاني
فرزو ليّ هذ المنام
وقولو خير وسلام
خير وسلام .