جردوني من آدميتي وما رحموني

تحاماوا شي ناس عليا
وبالحبال ربطوني
شدُّوا ليا يديا
وللحبس ساقوني
غمضوا ليا عينيا
وعلى الأرض طرحوني
كبلوا ليا رجليا
وبالعصا طيبوني
جبّدوا ليا وذنيا
وعلى الحايط صلبوني
لاحوني فمطفية
وبالما طايب سلقوني
عماوا ليا عينيا
وبدوا البرغوث رشوني
آش درت أنا فالدنيا
حتى يعذبوني؟
تخلطوا لعرارم عليا
وبكلامهم تلفوني
كنت فمسيرة سلمية
وعلاش مسكوني؟
داروا فيا الحمية
وماعذروني
بغاوا مني شي اسمية
باش يخرجوني
كلشي عندهم تسلية
وخا يظلموني
لبسوني ياناس تحتية
وعلى القعدة شطحوني
داروني غير تفلية
باغين يرهبوني
طال الزمان عليا
ولداري وصلوني
واحد فيهم قال لوالديا
غير عذروني
ولدكم عزيز عليا
ومن شوفتو ماتحرموني
مرة مرة جيبوه ليا
باش ديما تفكروني

سلام الله عليك يا أخي العزيز علي مفتاح عواشركم مبروكة
متابعتكم لتجاربي يا أخي تزيدني طاقة للبحث في كلامنا المغربي الوازن المرصع بالقوافي والصور.
أشكركم يا أخي مفتاح على هذه العناية الطيبة بما يخطه قلمي المتواضع.
منكم يا أخي نتعلم صور الكلام ومعانيه الدقيقة, ومنكم نستمتع بطيب الكلام ومذاقه الحلو.
والله كلما أقرأه هنا داخل منتدانا لشعراء أفذاذ , يجعلني منبهرا لما وصلت له الكلمة المغربية من عنفوان.
دام شعرنا الزجلي شامخا وسط شموخ زجالينا المتميزين.
تحيتي وتقديري لا حد لهما لكم يا أخي علي مفتاح ولكل من يحافظ على مخزوننا الزجلي ويطوره للأفضل.