فين حسابك...

فِينْ حْسَابَكْ

فِينْ حْسَابَكْ
يَا الغَالَطْ مَشْمُوتْ
دَگِيتِ لَوْتَادْ
وغَطّْاهَا الترابْ

حْسَبْتِيهَا بِالمَگْلُوبْ
يَاكْ كُلْشِي يفُوتْ
شْرِيتِ لعدَاوَة
فلُون غْرَاب

الدمْ عَارْ
وتَقْلِيد منحُوتْ
والنْدَامَة خْصَارَة
ما تْفُكْ مَنْ لعدابْ

حُطْ رْجَلْ عْلَى رْجَلْ
وسَاوِي
البَرْكَة گُدَّامِي
راهْ بْنَادمْ كيتبدلْ



وعْدُوكْ
فالدنيا آدامي
لا تْغُرَّكْ الوَگفَة فالظلْ

ولا تْنَسِّيكْ
الضحكة فسْلامي
الزمان غَادي ما يوْحلْ

ولمكان
حَطَّة فتخْمَامي
قاسَحْ الگلْبْ مَا يَعْدَلْ

وإلَى ظْلَمْ
مَا يحْسَبْ يامي
لَعْمُرْ
فْتِيلْ وللي فْتَلْ

قَشَّابْتُ عَافْيَةْ اوْهَامِي
الشُّوفَة خيط وحْبَلْ

والعين
سْْبَابْ غْرَامي
الحَق
فَتَفْرَاقُ ما يوْصَلْ

وفْرَاقْ لَحْقُوقْ
مَنْ ظُلاََّمي
اللِّيلْ عَتْبَةْ مْهَوَّلْ
والنهار
مزروب گُدَّامِي