لأني منكم تانتعلم سر القوَّه وتانتعلَّم سر الحياة
كلما وقفت قدام مقامكم العالي بالإبداع تانحس بكبدتي باغيه تسكتني باش تخلي دموعي يتكلموا ، لكن تاتخاف م البعض يقراني غلط. حيث ، ونعترفوا ، أن القليل منا اللي تايفهم لغة الدموع . ما تانقصدش دموع البصله أو دموع الدخان ولا دموع الحـﭭرَه والقرحَه أو دموع النجاح والفرحه. تانقصد دموع الشهامَه والنبل، دموع الكبرياء والكرامَه والتحدي ...
بغيت من كبدتي تشق صدري وتتحط قدام الشمس مرايه ، ماشي مراية عقلي اللي تقرات منها يا ما صفحات!، ولا مراية خيالي اللي سافرت فيها ليام يا ما مرات ...
بغيت كبدتي تكون مرايه اخرى، مرايه تدخل فيها ليام آمنَه مأمنَه تقرا فيها سر سري ، بل حس حسي، لأنها مراية حسي.
غتلقى كبدتي قويه بأولياء الإبداع الصالحين لأنهم كبدتي، ذك الكبده المقدسَه اللي جات ف محاورة طيماوس.
غتلقاوني قوي لأني منكم تانتعلم سر القوَّه وتانتعلَّم سر الحياة وفنها بالمفهوم الحضاري الواسع للكلمه. قوي لأني تانتعلم منكم معنى المحبَّه ف تجلياتها الصوفيه. قوي لأني تانتعلم منكم الإنسانيه ف مكنونها بكل مثلها العليا. قوي لأني تانتعلم منكم أبجدية الإبداع ف صيرورته بكل قيمُه الجماليه. قوي لأني تانتعلم نكبر وسطكم فالغايه الساميه.
وغايتي الساميه هي نكتب للحياة، نعيش للإنسان، ولو نكون غير تانحلم. قوي لأني تانتعلم منكم نكون فالمعنى الراقي ونا تانوسَّع مْداركي وتانوَّر معنايا ولو أنني من تصياد لمعاني تانعاني.
قوي كذلك لأني تانتعلم منكم كل يوم عشتُه وسطكم نكون أنا.
خلوني إذن نزيد نقطركم من كبدتي ... من عيني ، نحضركم ف مراية حسي حتى نتمرى بكم ...
انتما كبدتي ومرايتي وهالتي وحسي الفايض ضو ...
هذ الضو اللي علمتوني ندخل له من قلوبكم وناخذه من اعماقكم، نشعل منه نار احلامي وافكاري، نشعل منه نار رضايا وحناني، نشعل منه نار حروفي وخيالي، نشعل منه نار وجداني وكياني...
المجد إذن للقوَّه الإبداعيه اللي تتغلب ع الفراغ والياس وقِوى الشر . الإبداع اللي يكون ف خدمة الضمير الكوني. الإبداع اللي حامل رساله إنسانيه، اللي تايعمل على تشييد مستقبل أكثر ازدهار وأكثر حريه وتعايش بين اجناس البشر ....
إدريس أمغار مسناوي
" ش . ش "