عطار لحروف

ها عطار القبيلة
هاز قرشانو ويدور
يرطب الحروف
ويجر مدادها
كل حرف شجرة
ويزيد
يقرشن
كيف الصوف اسمادها


وكل
غلة
وتمانها
كيف الحروف
فسوق الضحية
كل خروف
وتمانو
ها الحرف الفرطاس نازل
منسج بلا مغازل
ها اللام صردي
سومتو معلقة
فعلام
والزعيم يهرس الكصبة
وينزلو
ما يكون شحيح
لدارو تقدى حرف
امليح
ها التا
ما عارفة مادير
ومحيرى معاها لحروف
ما شدات الخط
كيف شداتو النيارة
ما تعلمات كيف لحروف
اصواب
هاهي كيف النسر
ف السما مطلوقة
ها هي كيف الدودة
تكمشاة وماتت بالغدة
من حر لحروف محروقة


قرشان العطار
ما يحشم من لحروف
وفيها ما يحن
ما يرحم

الصاد صاحبه
من صغرو
عاشرو
وداعبو
و مرة مرة
يعطيه طرحة د العصا
يخرج معاه الطريق
ويزيد يرجمو بحجارو
غي هو العطار
احول
كيزكل


ظهر الصاد
ما تجي فيه غي حجرة
وحدة
وعليه ترسمات

ماهي عليه تقلات
غير وكان
ظلامها قبيح
كون ما ضواتو نجمة الزين

وسين العطار
كوجه الطراح
عليه باين الشر

وقلبه مافيه مايرحم
عامر غدر

ويزيد يعدب نعمة ربي بالعافية


هاهو

رجموه تلت مرات
على زلة لسانو
بحال
غراب بغا يعاند فالنقا حمامة

شاشية ما تغطي الراس
تعاند لعمامة
واخا غطى الراس مايبغي زربة
يطلع ناقص ومسوس
فحال داك الراس العريان
دعطار لحروف
حفيان وخاصاه فهامة


حمار العطار
حروفو
كلها زينة
واخا ما ورث
منها حروف الزين
ولا صروفو
لاماليف فوق راسو
غي ينش بيها الذبان
ما بيها سد اقواس احزان
مابيها عرف انسان
وعيا عطار لحروف وحمارو
ونزلو جنان لالة
يرتاحو
تما ينفسو لحزام
وتتنفس الها من التشنيقة

ويعيط الواو للكاف
فينك يا كافي يادار جدي وسلافي
ويطل القاف يلاقي
غطي العطار وتهلا فالبهيمة
وازرع فجنان لالة لحروف
وخلي الميم من ماها
تسقيها
زمزم
تكبر وتتعانق
حب وورود بلا شوك بلاخوف

امينة لك ابهى ساحات المرور لك كل الورد تحية هات يدى لتحرير القصيدة دمت ودام عبورك بود لك محبة لا تشيخ
بغيت نقولك ختاري من شواري العطار حروف او حلقات عارفو زوار وماتليق ليك هدية تحية من ورد