حمار وبخير

حمار وبخيير

فثوب عرايا
تخبات احلامي
وفقلت غطايا
ركَدت ايامي
واااا فياقي
وصلتي ولا باقي
وخا ما حلات الركَدة
ياك التقشاف قوامي
صايم بطول عامي
ودوك الناس
دارو لاباس
عايشين فدفا ورغدة
فيلا ومانوار
ويسكي سيكَار
ليالي حمرة
بورش وجاغوار
الزردة تابعة الزردة
داروها من عركَي
وتمارت عضامي
وانتما عا قولو
حقي انا فين
ولهفو وكولو
ربحو بالرتبة ولبلاصة
خليت ليكم السياسة
ولصقو ضهوركم فلكراسا
وانا ركبو ليا لحلاسة
انا نيت حمير جدة
ديما عاثر فلجامي
حمار وبخير
دايرها لراسي تزكَير
حنت انا اللي صبرت
وعلى شين فعايلكم
ميكت وسكت
أنا اللي فالإنتخاب
تيقت نبيح لكلاب
عو عو عو عو
ومشيت صوتت
وخا شاخرة فيا العضة
وأثارها مداوم سقامي
عا زيدو تقال الشواري
لا تقادو ليا ميل
وشكلوني بلحبال
كَيدوني بالسلاسل
ويكون الشكال ثقيل
سوطو زندو جماري
خلوني كَادي شاعل
فلعذاب ديما حاصل
انتوما هربو وانا واحل
ما نلقاكم فالشدة
ولا تقاد بيكم حزامي
راني داعيكم لله
وديما متشبت بالشعار
إلى ما قداتكم ساعة
زيدو ليلة ونهار
زيدو فالدقيق
تقلوني بالضريبة
زيدو فليصانص
زيدو فالزيت والسكار
وها حجر العافية
ورميت عليكم العار
خودو دمي
قطعو لحمي
خودو حياتي
خودو اللي بغيتو
وخليو لبلاد فأمان والتيقار