كال لي
انطق
ابلا ما اتمنطق
اهضر
وكر
وكول اللي كان
كلت ليه
ياجلادي
يا اللي ساير ف تجلادي
كيف اتكون احكيم وقاضي
وانت حكمك فاضي
املبسني اذنوب اكذوب وبهتان
مللي اعليك انادي
نلقاك زايد ف تبعادي
شاطني باسوالات
اجواباتها
ف لقلب اترشكات
امكتفاني باحبال
وامصلبة ذاتي اعلى عمدان
باغيني نتكلم
وانا ما عندي فم
والغايا باحبل اتخبل
واعكد امعاه اللسان
باغيني نسمع
وانا باصمغ
اقدام وادبغ
اكرم وسد ليا لودان
باغيني انشوف
وانا كيف احروف
امعلقة ف ارفوف
اكلاتها الغبرة
وخطها ابهات من ازمان
يا جلادي
يا للي اتسقصيني
وف حر لجواب تاتديني
تاتقليني
تاتكليني
تاتشويني
سول
وزيد سول
انت يا اعقل
انت هو مول لفعل
وافعايلك اعليك حجة وبرهان
يا جلادي
يا الشاحط ذاتي
وذاتي خشبة
تابعة النفس ابلا سبة
هي دارتها
وانت غير اهبل
فيها اغمس وواحل
ومللي لهبالك ما لقاو حل
كتبو اكتاب
منو دارو اسبوب واحجاب
ف ازلافة غطسوه
ومن ماها شربوني شلا كيسان
يا جلادي
يا لمعشش ف هاذ الراس
ما جيتي تحت لقدام وانخليك اتداس
مغروس ف هاذ الخشبة
لمسوية من طين وتربة
عل البر سايرة اسفينة
احسبتك قايدها
القيت النفس شاداك ارهينة
امحكمة فيك من ازمان
يا جلادي
يا لمحزم لتهدادي
راني لا امع هذا
ولا امع هاذي
انا امع احروف
طالعة من اكبادي
ترجف مللي تلقى لغنان
ساري
والدم
جاري
بين ابنادم اللي اعليه كالو انسان
يا جلادي
ارخف لحبال
يتمدد لطوال
خلليني امع احروفي جوال
اتصبني
تفركني
تعركني
تدلكني
انعصرها كتبة
انشرها امحبة
من ابحور ادماغي طالعة ميزان
الى تاهت مني
انتيه اوراها
انقلب اعلى مركد اخفاها
وبقنديل ما يطفيه ريح
انسيح اوراها حتى نلقاها
واعلى اسطور اوراقي انحطها عنوان
اخفرتها
حفراتني
انقشتها
نقشاتني
ارسمتها
رسماتني
شمس طالعة
ديما ساطعة
ف اغروب ما طامعة
وقلمي ما اتخليه عطشان
دخلاتني
سكناتني
ف ساحة عقلك شركاتني
ومللي انموت اتكون ورثاتني
واتكول
انا
انا
هي اللي خلاني ذاك الولهان
عبد الفتاح بوهو