[
adil lotfi
دقت ف باب خاطري كلمات
جاوبها بلا خباري :
لا حد هنا
سالت على العتبة نغمات
حامية من صهد ناري
فضحتنا
الكلام اللي ظنّيتو مات
لازال ك السواقي جاري
شفت فخاطري
رد عليا ببسمات
مدّينا
الكاس اللي فيدّينا
غرفنا من المعاني
روينا عطشتنا
Abdelilah Khadiri
في أنا شفت لعجب
حضنت على بيضو
حتى فرخ
وكبرو فراخو
ذفنوني فعشي وراحوا
والعام لاخر
جاو
سولو
على عش باهم
لقاو عظاموبمواج لبحر
رشاو
وملاحو
Adil Lotfi
حرك الكلام يبان المشتاق
المعاني اللي فيدّيكم
تدّيكم
فرمشة حرف
لقلب الذوّاق
طرزكم زيّن يْزاري
الكلام خيط
و الاقلام يْباري
و الكاتب زوّاق
Abdelilah Khadiri
ها لمعنى طاح
وها راس حروفو
ارخى راسو
دلى فعلو وشعرو
ومابقا فعمرو
وزاوك فغراب الدوار
ياخدو
هرب منو لكحال
وغطاه بجنحو
ببياض ذاك لحمام
وقالو شد كحالك
عيش وحالك
وبني فلجبال كهوف
واخا تكحال لحروف
وفالحلق غمة
ووحال
هي بياض الدنيا
ونورها
وهي الجنة
ببحورها
Adil Lotfi
سالت من سمايا غمامة
من زمان
ما بكات
لرض الساكتة
روات
و زريعة الكلام
فاضت بالمعاني
شجار، ظلها
من حر الجهالة
حماني
و جنيت من عروشها
المحبة
كلمات
Abdelilah Khadiri
خلييها تبكي عيون لغمام
وفعشك يفقض
البيض حمام
وتكبر بفدان لمعاني
وخلي باب عشك مفتوح
يزيد بهاه
تخرج منو لفراخ قصايد
تطير فسماه
ويقصدو
ضيف
الله
Adil Lotfi
قفال باب جناني
سوارتها
المحبة
صفي الخاطر
و ادخل
مرحبا
جني من المعاني
عنقود
ولا حبة
Abdelilah Khadiri
الصهدد الصهد
والليالي حياني
وتنشاف لعرق عياني
و حد مابقي يعرف حد
وحفار قبورهم
بترابو
كيف غبار الحشمة
غطاني
بكيت
ونسيت الخارج من جناني
حافر علجذور
و كل مرة يزورو
مكمش ورودو
فطلوعو وحدورو
مكمش ورودو
فطلوعو وحدورو
ونساني
غرست لعروق
فيا سلوكا
وسقيتهم دم غمامك
نشفات سلوكي
يعيى
من يهدم
ويطيحو كثوفو
وما يعيى
بناي معاني
فيها تسكن
حروفو
Adil Lotfi
برشة زهر
سقيت حرفي
نبتت وردة
زينت جردة
اوراقها تهدر
و الحانها
تشفي
Abdelilah Khadiri
شوف علا زهر
طول لحياة نشف وغاب
بان وخياب
قاد ظهرو وعاب
وحتى ردمو عليه التراب
عاد كان بزهرو
راسو بيه رطاب
وبالزهر اغسل اقدامو
شكون يفهم
من الزين ما عاب
وشكون يقاد وجهي
فالمرايا امقامو
شد وجهك حرف
وبالحروف يتوالد
ويزيد ابهاها
زيدها فالقصيدة
عقدة فتسبيح
بيها تسبح لفجر
وكل الليالي
وخلي لحروف
رطبة
كيف وسادة
تحضن النايم
فاحلامو
Adil Lotfi
شفت ف مرايتي
حروفي
لقيت عين بلا حاجب
ليف سيف
دال منجل
يحصد المعاني
و لام مظلل على خوتو
من كاس الهوى
اللي توحشت حلاوتو
سقاني
Abdelilah Khadiri
كلامك سالف
بكحالو
وسط الليل تالف
, كلامك نعمة
نجمة
نص هلال
قول هو هبال
كيف نعاسي وهبالي
سير على داك
الحال
وساعف
Adil Lotfi
كلامي ف دروب المعاني
جايل..
مادامت ف عروقي
حروف
نقسم و نزيد ف الحلوف
ما نخاصم الكمرة
ما نقتل
ف خاطري النظرة
ما نهجر الضو
السايل
على روحي
قطرة قطرة
....
نحلف
و ما تسالوني حلوف
Abdelilah Khadiri
سيح
كيف ساح دمي
كيف كثرات
حبوب الهم
فيامي
كون وسادة
تتوسد راسي
والشايطة من احلامي
كون راس الجبل
كون لعقل
اللي اهبل
وكون وردة محمرة الخد
واخا ذبالت
ف الوجه خدودي
كوني
لحمر
مايكحال
واخا
وجه الشمس كحل
بلعاني
لون القلب
وورودي
كوني الدم
فقلبي
كوني
فالوجه
خذودي
الرئيسية 
