روح ولا تسال

لما جدت علي
يا ليلي
بضي نجومك
تمنيت نكون حجر صم
ما يشوف ما يتكلم
صابر لدواير الزمان
صامد ثابت في المكان
تمنيت نكون شجرة سدر
ديما خضرة
ولما تقطع تخلف وتزهر
تمنيت نكون صبار
بشواكو صابر
ولشوفت العين مايقهر

واليوم
لما لقيتك في هاذ المكان
اللي شهد ليا على دموع الزمان
تعاتبني...
أني سباب كيتك
تلوم شوفت العين الذابلة
من كثرة السهر
ناسي قلبي
اللي بجمرك تكوى

قبل ما تلوم ولا تسال
سمعني مزيان
يا صاحب المكان
همي جبل ضام وسطو بركان
بحرو راضية
ما نبكي..ما نشكي
وجروحو
نداوي بكيسان النسيان

روح ولا تجيني, لا تسال
لا تذكر ليالي
تمنيتها شحال..
بالله عليك,
هجر ليلي
ولا تعثرني في طريقي
بعدما تحجازت احلامك
لا تفكرني علاش الفراق
علاش النسيان

أنا خلاص عزمت الرحيل
في طريق الوحدة
ندفن دمعي
نضمد جرحي
ونضم قلبي بدفا الليل
نغذيه بضي النجوم
ونتغطى بصمت الكلام
المطرز بمداد القلام

خلاص يا كحل العيان
يا نسمة الشطآن
لا تسال علاش الفراق
علاش النسيان
طريقي طويل
قادر اجاوبك بعدما يمر الزمان
ويتفرقوا صباعنا
بعدما تشابكو بأحلى كلام
خلاص الوردة ذبلات
وعلى وراقي بصمت
صمت الفراق

فاتحة المودن