ادلالي
شكون ادلالي .......
يطفي جمرة لعناد ويطيح علامو
من هنا داز كلاب لمحاين
زرع دي ما كاين
سكا لقلوب بما شلوقي
طحن غلاب الزمان كتاف رجال
ودار لهمة تحت مدارس لمحاين
جوا من جراح لخواطر
غرات بينا السوار
لهايمه في لمغشوش
عشرة شكون وشكون
ادلالي رامي والشاري اعمى
ڭضيت ادلالي من سم لكلام
بلا ما تفيق عاوتني السر النايم
بلا ما تنقش يدي بلحناني
وتقولي راه لقلب هاني
يا زاير صلاح بلادي
بلا ماتزوق شمعتي سايحة بهبالي
بين سيدي بليوط وولاد حدو لحرار
شاعلة ديما بالنية الصافية..... تلالي
عراسية نركز على جفنة لمحاين
مجدوبة ليام وشكون يفهم لمعاني
ها لمارا في لخاطر وشم بيضاوي
جيتك وجيتك ادلالي
حاطة سينتي برادي من لدون
وكيسان حياتي هايجه بغرام سواني
عاشقه تراب سواري لحروف
سايحه مجدوبه في شهد ليالي
عنايتي في لقوافي مسلحه باصالتي
محلمه شكارتي بكلام معسل
مخاويه حثيث قح بيضاوي
شڭيت طرقان امولاي
على صدر لمعاني
نعق كليمات مزلڭه
في شرك لحروف
كيف...ضاد نڭطة ..من فوق
عنقتها على ڭاشوش يامي
ضيم وحيرة.... واحياني
نسال بيها علامة لحرف
وسين ما تنڭط
فرادية على رسام ..سراري
ادلالي
حزتك ورمتك ليا ما رامت روامي
جيتك وجيتك سابقه هبالي
عشر خطوات في لوطا بيضاوي
ورجل ترجف في لهوا براني
ابلادي يا ساكنة دفئ ضلوع
يا معمره لخاطر لحداوي
ادلالي ...
زممني عكر يامي
ابكي اليلي بكي
وزيد في سهادك
كطر من كحل ظلامك
ودك حروفك في سروج ليالي
ودلي سوالفك يشة
مدڭوڭة في ضلوع
تنزف بدموعي
محرزه بالصبر
هذا مڭواني اغلاب زماني
تڭر كيف لعادة
ايوا اسيادي السامعين
خبيرتي صلت بيها بحور وقوافي
وجات مسرجه شلا كلام وشلا معاني
ولفاهم يفهم ولا غير يضرب رش
حتى لمره اخرى ويفهم كلامي.
قصيدة كتبت ببن ملال
الرئيسية