عهد الله آآآلكلمة
حتى يعيش سكاتي فيك وفي
على دم لوجه
لموسد الدي ...
حالفة بحلوفك
حتى يغبر نحاسي فيك
كل ما سعفني شوقك مني في
يا لكلمة ماهزك ريح...
غير
نوحي على سياد لحكمة
وزيدي في نواحك
حكي ليهم سر بعادي
يمكن...تكون من ضوهم الكاينة
تخبل لكلام وخسر ميزان لقوافي
تحيرت لحروف على جدبة ماليها
سولتني ...فين انا من هذا الدي
فين انا من لحثيث لعزري
فين انا من عزيب لهدرة
وايلي ......انا هنا ولهيه...
مجدوبة لحرف ...ياكما نسيتوني
ال بيني وْ بين لكلمة خير وسلام
راني غير مجدوبة لحرف ومعاني
الى مديت ...لمعنى باللييييييل
وطال سهادي مع خبالي
نبين حد لكلمة ونقيس ليسيب حزامها
ما طيح لكلمة ما تعطي طوع
ولو تكون عبد مشرط لقفا
الكلمة نار بحال الجمر الدافي
تزند تحث رْمـــاد الـقـوافـي
مرّهْ تشفي لقلب لولهان,
مرّهْ تكوي وحرها يكـون شافـي
الا الكلام ساب....
اشنو فكاك لمحرز في سراري
هوى لحرف سلب لمعنى
من قصايد ...وقصايد غاوية
تسربل شمار حروفها
بلعلالي....
واااااااااا لكلمة عليك النادي
تمنيتك يا عشيرة لعمر
سيف شفرتو ضوا من نهار
بيني وبي حرف ومعنى
نسرج قصيدتي بالعدة
واااااااا الكلمة الحرة
لا تسيبي جلالك
لا ترخي لجامك
لا تدلي سوالف الجدبة
غير لكنتي عطشانة نرويك
من دموعي.. نزمم شلا هدرة
واخا لكتبة بالما خسارة
وبسكاتي نغطيك
واخا لغطا بالبرد هبال
لكلمة لتوسدت ظهر لكتاب
دلالة تهيم بيك وبي
راه
ماهمني غير لكلمة لي
ضاعت بين حجية ليالي
راه ....
لكلمة همة .. ماشي ترقاع
لكلمة شان ماشي رياسة
راه
غير فلت مني لقلم وتهرقات الدواية........