علي مفتاح Admin
عدد المساهمات : 468 تاريخ التسجيل : 08/04/2010 العمر : 59
| موضوع: بيان من حروف خارجة عل السطر 2011-04-05, 04:08 | |
| بَيانْ مَنْ حْروفْ خارَجة عَلْ السّطَرْ دَقْ وُ دَقْ عْلى دَقْ وُ بابْ لُغْتي مَسْدُودْ سابَقْنِي صَمْتِي ليَِّ باني فِيَّ سْدُودْ نَفْتَحْ لَلْفاتَحْ وُ نْسَكَّنْ المَسْكونْ الفِعْل خاوي المَفْعولْ مْسَاوِي الضَّمِيرْ ﯖناوي وُ المَصْدَرْ هَدَّاوِي وُ الفاعَلْ ... آشْ يْكُونْ؟ ادْخُلْ لْخارَجْ السّطَرْ وُ اخْرُجْ لْداخَلْ السّطَرْ وُ شوفْ آشْ يَكُونْ يَمْكَنْ التَّا(ء) المَرْبوطَة فيكْ انْتَ يَمْكَنْ الضَمَّة مَنْ زْمانْ مْقَدْرَة عَلْ الصّدَرْ يَمْكَنْ الشَّكَلْ جَا(ء) يصالَحْ المَضْمُونْ يَمْكَنْ الجَّارْ بْ كَسْرَة الخُبزْ مَكْسُورْ يَمْكَنْ خْيَالْ الحَالْ رَكْبُه الحَالْ جَا(ء) طالَبْ راغَبْ يَدْ السُّكونْ صَدَّرْ المَصْدَرْ الضَّمِيرْ إلا اتَّاصَلْ ... غَيْبُه فْ لَفْعالْ يَمْكَنْ يِفَاصَلْ وُ يَبَدَّلْ الحَالْ واوْ العَطَفْ قَسَّحْ ﯖلْبَكْ عْليهْ وُ الضَّميرْ إلا اتَّمْنَعْ مَنْ الصَّرَفْ يَتْسَلَّفْ حُرَيْفاتْ وُ يَشَدّْ الصَفْ السْطَرْ لَمْدَرَّحْ راهْ يَحَنَّتْ شَمْ وُ تَبْلَى خَلِّي لَحْروفْ تَبْلي السْطَرْ قَصَّصْ المَعْنَى وُ بْرَمْ الحالْ وُ السْطَرْ خَلِّيهْ لَصْحابْ الحالْ. دَقْ وُ دَقْ عْلى دَقْ الكَلْمَة فْ سَطْري هَمْزَة تَحَتْ الدَّفْ وُ نونْ الجَمَاعَة عَمَّالَة انْتَخْبُوها لَحْرُوفْ ما فَكْرَتْ فْ بْدالَة وُ الضَّميرْ إلا انْفاصَلْ عْليكْ وُ عْليهْ يَتْفَرَّجْ عْلَ الفِعَلْ وُ الفاعَلْ وُ رَِّيهْ وُرِّيهْ وُ إلا ما قْدَرْتِي على إعْرَابُه سيرْ وُ خَلِّيهْ. دَقْ وُ دَقْ عْلى دَقْ وُ لاغيني بْ كُلْ اللُّغاتْ سارينِي كُلْ الحَلْماتْ نْدُقْ عْلِيَّ فِيَّ إلا ما لڤِيتْنِي ... نْشُوفْنِي فْ المعنى يَخَبَّرْنِي عْلِيَّ وُ هَا الدَّالْ المَذْلولْ هَا اللاَّمْ المَشْلُولْ وُ ذيكْ التَّا(ء) لَمْخَنْثَة مْزاحْمَة اللِّيفْ عَلْ الحَا(ء) وُ الشَدَّة شادَة حَقْ لَحْلامْ وُ الواوْ رابَطْ الضَّعَفْ فْ لَكْلامْ وُ شْكُونْ شَادْ تِيقارْ السْطَرْ؟ الفِعْل ؟ الفَاعَلْ ؟ وُ لا الضَّمِيرْ لِّي غابْ وُ لا ذاكْ المَعْنَى لِّي سابْ. دَقْ وُ دَقْ عْلى دَقْ اللُّغَة عْليهَا حَقْ السْطَرْ المُسْتَتِرْ فيها الله يستر ... عطى للفاعل بالظهر العَلَّة كانَتْ مْقَدْرَة بينْ ذاكْ السْطَرْ لِّي كْتَبْتُه وُ بينْ السْطَرْ لِّي كْتَبْنِي وُ ياكْ الفاعَلْ فْ سَطْري مَنْصوبْ وُ الجُمْلة ساسْها مَقْلوبْ المَبْدَا فْ آخِرْ السْطَرْ وُ الخَبَرْ فْ أَوَّلْ السْطَرْ وُ فينْ مَحَلِّي أنا مَنْ هذا السْطَرْ؟ دَقْ وُ دَقْ عْلى دَقْ وُ شكونْ قادَرْ يَبْقى مْقَدَّرْ ؟ يَشَدّْ كَيَّة افْعالُه يَزيدْها عْلى ظْلامْ احْوالُه يَشَدْ الصَّفْ فْ السْطَرْ وُ إلا الﮕومَة دَخْلَتْ وُ ضَرْبَتْ الطَرّ وُ لَمْدادْ فْ دُوايْتُه حْفَرْ قْبَرْ باشْ مَنْ لُغَة غَ نَكْتَبْنِي ؟ باشْ مَنْ مْعاني غَ نْعَبَّرْنِي ؟ نَنْفِيني فْ "المَا" نْسَبَّقْها وُ نَرْتاحْ نَنْفينِي فْ "لا" نْعَنَّقْ لامْها مْسا(ء) وُ صْباحْ. امْحِي يا الﮕومَة امْحِي الفِعْل لِّي حَزْماتُه لَحْروفْ وُ ما عَوْلَتْ عْليهْ امْحِي يا الﮕومَة امْحِي الفاعَلْ لِّي صْحَبْناهْ فاعَلْ خْرَجْ عْلَ السْطَرْ طْعَنْ فْ الظْهَرْ وُ سَدْ عْليهْ امْحِي يا الﮕومَة امْحي الضَّميرْ المَتَّاصَلْ اللِّي فاصَلْ باشْ يَنْفاصَلْ وُ اخْرَجْ خارَجْ السْطَرْ يَزاوَﮔ فْ الﮕومَة وُ وْسَخْها لاصَقْ فيهْ دَقْ وُ دَقْ عْلى دَقْ واوْ الجْماعَة ما بْقى يَصَفَّقْ حْروفْ الإشارَة مَخْصوصَة بْ إشارَة بابْها مَسْدودْ وُ مْطَرَّقْ وُ شكونْ يَرُدْ هذه لَحْروفْ للسْطَرْ ؟ يَشَدْ الفِعْل يَفْلَتْ الفاعَلْ وُ الَمْفعولْ بينْ الﮕومَة وُ وْسَخْها واحَلْ دَقْ وُ دَقْ عْلى دَقْ وُ ما بْقَى فْ لُغْتي غيرْ الجَرْ جارَّانِي خارَجْ السْطَرْ نْزاوَﯕ فْ الفِعْل يَصَدَّرْني للمَصْدَرْ نْبُوسْ يَدْ الفَاعَلْ يَصَرَّفْني للغايَبْ باشْ ما نَحْضَرْ ما بْقى غيرْ المَفْعولْ مْشَرَّعْ بيبانُه مَحْلولْ تابَعْ الفِعْل عْلَ ﯕانَةْ الفَاعَلْ يَدَخَّلْني للسْطَرْ هازْ گُومَة مْقَدْرَة تَمْحي لَفْعالْ فِيَّ وُ إلا خْرَجَتْ مَنُّه ... وُ ضَميري انْفاصَلْ يَتْفَرَّجْ عْلِيَّ وُ يْقول لِيَّ : تكلم هدر اختار آش من سطر ها المفعول ...ها الجر يجيه جوابي من ورا السطر "راني رافض نكون مفعول بيَّ نعلف و نجر لحروف ديروني نقطة و رجعوا بي للسطر رافض نكون صورة مفعولة رافض نكون جملة مذلولة رافض نكون حطب رافض نكون هدب تدفاوا بي ف هذا السطر خليوا لي الفعل وُ غير خوذوا الجر ". دَقْ وُ دَقْ عْلى دَقْ بْنيتْ همي عَلْ المَجْهولْ وُ احلامي مْرَيَّبْها المَعْلومْ ظَرَفي ف الزْمَانْ طاوْياهْ ثَلَثْ حْروفْ ظَرَفْي ف لَمْكانْ خانْقاهْ الشَدَّة وُ نڤولْ مَرْخوفْ وُ انا سَطْري مْخَبْيَاهْ السِّينْ وُ ذيكْ "سَوْفَ" لَحْرامِيَّة مْؤَجْلَة مْعانيكْ وُ مْعانِيَة وُ لفْعالْ فْ السْطَرْ كُلْها وُ حالُه هذا ثني هذا رباعي هذا فرادي هذا جماعي و شكون واعي ؟ يجي يرجعني للسطر يدق يطل من الشق و يجرني معاني لذاك السطر يا سطري يا البانيني للمجهول يا سطري يا لمريبني بالمعلوم تكسرني الفتحة و تسكني الضمة و يجرني السكون و نفتح زوج قواس قوس وسط السطر و قوس نبنيه غايب عل السطر نكتبني بين السطر و السطر و لي دق على قوس المعنى ... راه يلقاه ورا السطر نصالح لازم مع المعدي ننقص من التام و نزيد ف الناقص و إلا سطري بقى ناقص بناقص نغيب مع كان و خوتاتها حيت نقصانه فيه إن و قرناتها دق و دق على دق الخط ف سطري ما تسكم ما صدق الفاعل ف سطري دخل متعدي واش كان لازم و لا غير كيعدي؟ فاعل قصيف معرف و ناكر بالسيف و ياك المبدا خاصم لخبار و الجملة ف السطر بلا جمال فين البدَّال؟ فين الفعَّال؟ فين لحروف لي تسكني ف الحاضر؟ الفتحة دايرة فاتحة و الضمة ف جنان الكسرة سارحة و السكون مسكني ف صمتي و ما بقى غير الجر مضايفني ف هاذ السطر ساد علي باب لغتي يدق و يدق يقول لي: تكلم هدر يجيه جوابي من ورا السطر " رافض نكون مفعول بيَّ نعلف و نجر لحروف ديروني نقطة و رجعوا بي للسطر رافض الجر تابع فعل الفاعل و مقدر و علاش تصرفوني للغايب ف هاذ السطر؟ ".
| |
|
???? زائر
| موضوع: رد: بيان من حروف خارجة عل السطر 2011-04-05, 06:04 | |
| واد من الزجل....مائه العذب..دواء للقلب....شكرا عزيزي على مفتاح....انت بردت غدايدك ف الكتبة وبردتيلي غدايدي ف القراية....شكرا جزيلا..تحيتي |
|
عبد الحق بوشفر
عدد المساهمات : 175 تاريخ التسجيل : 21/10/2010 العمر : 35
| موضوع: رد: بيان من حروف خارجة عل السطر 2011-04-06, 02:45 | |
| بعد غيابي سعدت بهذا البيان..قصيدة في حجم نبلك..رائعة من روائع السي علي مفتاح دمت لنا و للقصيدة على قيد الابداع سعدت بمرور من هنا
| |
|
حبيبة زوكي
عدد المساهمات : 27 تاريخ التسجيل : 03/04/2011
| موضوع: رد: بيان من حروف خارجة عل السطر 2011-04-07, 07:35 | |
|
سلمت حروفك العميقة أستاذ علي مفتاح، الكتابة نقش يعطي صورا و معان ثاوية بين الجمل المتراصة كالعقد..
لا عدمناك ، سلمت و سلم يراعك
| |
|