من بكري
جاني فياقي
ف هروب النعاس
و الليل وقت باقي
...
گلبت جنابي
ولا أنا بيت النعس
لوسادة درت فوق راسي
بيت نخنقني
...
رجعت تگيت
حليت عيني ف الظلام
طلقت سراح لفياق
(…)
نشوفني غادي ف طريق ملوية كيف تخمامي السارح ف خلا مراية هي مني مگادة.
جوج أحنا..وليت ها رفيق لقيت إشاركني طوالة الطريق بجنب واد حامل.
ولاقنطرة ليه غير جوج حبولة من خيوط الرتيلة عگداتها مرخية ساهلة تقطع.
قلت:
نرجع حتى إنشف الواد.
جاوبتني أنا:
هاد العام شتاه طويلة محال واش تسحا
سماها سكرانة بشراب سحاب معتق.
(…)
جاتني فكرة ندرني قرعة من جاج و رميني ف ما الواد الجارف
إمكن تلقاني إيد صياد لحوت الشابل إقراني برية فضول بنادم .
نجيه كتبة غامضة إتفكرني حرز كنز ف غار جبل بعيد عالي
عامر بالثلج .
على طول العام مقابلينو جنون كوحل
هي ليه خادم تكسكس طياحو ف عصف الريح الباردة حبات تبروري
طلوعو واعر.
(…)
الصياد ضرب لفگد ف قصبة صيدو
تلقني ثاني للما وجع بكية على حطو التاعس
تفكر ولادو و حمل مراتو التاسع
ولا حوتة إيام هذي ف الگصبة جاتو.
( ...)
داني الما ف هبطت شلال حادر
ليلة كاملة عاد وصلت ليه ف صباح فايق بكري بحالي
إطل على وجهو المقسوم بموس ليل قاطع
على قبل گمرة خانتو
و الشمس غارت على صباحها ف شروق باهت
حازمة راسها بقفال كيف عزبة جاها حق الشهر
سبب ليها فقيه سبوب لبهوت ف زلافة من طين
بدم النافسة إتحيد عكسها الباير
عريانة واقفة جنب الواد حاسة بالسمرا
نزلت للما عايمة بسبع غطسات
ضبابة عورة غطات لمكان
عومانها عومان حوتة
تغنص و تطلع ثاني
(…)
تلقى گدامها قرعة مسدودة عايمة معاها شافتني فيها
سترت راسها خارجة من الما تجري
تتخبى ورا شجرة الفرشي.