أمي منانة والمدونة

موضوع: أمي منانة والمدونة 2011-01-17, 20:35

سولت أمي منانة
احياتها احسن ولا أنا
جاوبتني وقالت
سيري يا لهبيلة، حياتك كلها اغبينة
دارك ما اجلست فيها
واحياتك ما اعقلت اعليها
ا خداتك احلامك لكبيرة
اتحملت مسؤولية ما قديت اعليها
اركبت اسفينة، وامشات بيك ابعيدة
ارماتك ف اجزيرة، جزيرة بلا بيبان
محلولة فيها كل الطرقان
وابقيت تايهة وتاه بيك الزمان
جاوبتها وقلت لها: آم منانة
حياتنا متحضرة وساهلة
ما نسكيوا الماء من البير، ما انطحنوا اطحين
حقوقنا كلها اتمتعنا بيها
والقيود اللي كانت مكبلانا
كلها اتحلات والترمات مورانا
والعنف ضد المرة قل في ازمانا
والجهل ما ابق ف صفوف نسوانا
وما بقينا لقمة ساهلة لرجالنا
واصبحنا اليد اليمنى لولادنا
والراجل ما يقرر حتى ياخذ راينا
وشاركنا ف جميع الميادين
ف الطب، ف التدريس، ف الرايضاة
وسقنا الطيارة واوصلنا حتى الوزارة
جاوبتني أمي منانة:
حياتك آبنتي زربانة
وخوفي عليك من ديك المدونة
ما اتزوجات لمرة الهجالة
وما فرحات البنت المسرارة
أما الرجالة من الزواج صبحت هربانة
آشن اخديتي من هاذ الحضارة والتقدم
غير الأمراض والهموم
قلت لها: آمي منانة
خليني اعليك راه ازمانا ما هنانا
انسايروه آمي منانة والله يكون معانا.