الطير والنملَه
كان يا ما كان واحد الطير مطور ، فين ما بانت له الحبَّه تَينزل عليها. تضايقات منه واحد النمله وقالت تشكي به. مشت عند السبع ملك الحيوانات ، ملي وقفت قدامُه وشكت ليه، قال لها " أنا ما تَنحكمش فالطيور". مشت عند الثور مول قرن واحد وقال لها "الطير اللي انت كتشكي به راه كبر معايا وتَيرعى فوق ظهري" . مشت عند الكيدار ، وقال لها " أنا الطير تَنشرك معه علفي، آش بغيت نعمل له؟". مشت عند بيبي هزت به باش يسمع لها، قالت له "يا ملك الطيور ، بغيتك تاخذ لي حقي من الطير الفلاني". قال لها "ما عندي ما نعمل لك ، أنا ما تَنحكمش فاللي تايطيروا ". قالت له " ملي ما ف يديك شي غنمشي عند مولاي بلارج ". قال لها بيبي " آش كتعايني ، سري قبل لا يفوت عليك الوقت". طلعت عند بلارج ، قالت له "يا ملك الطيور بغيتك تاخذ لي حقي من الطير الفلاني". قال لها "هذاك حبيب تَيحضي لي البيض ملي تَنغيب ".
رجعت النمله تاتبكي، لقاها واحد الثعبان فالطريق ، قال لها "مالكي آ النميله ؟ شكون بكّاك ؟ ".
قالت له : آ سيد الثعبان واحد الطير تَيخلي رزقُه فالسما وتَيجي ياكل لي رزقي اللي فالأرض، وملي انهيتُه وهدرت معه ما بغش يسمع ليَّ، قلت له "راك إلى ما شديتيش تقارك غنقولها لمولاي الثعبان"، قال لي هو "فوتيه الهيه، أنا ما تَنخاف من حد ".
_ هو قال لك هذ الشي؟
_ قال لي ما عند الثعبان ما يعمل، هذاك تيخاف من خيالُه وديما مخبي ف غارُه خص هو اللي يحميه.
_ قال لك ﮔاع هذ الشي؟، ها احنا غنشوفوا شكون الخواف أنا ولاّ هو .
جا الثعبان للرَّحبَه ذالزرع فين تَيجي الطير ياخذ النقب وتلوَّى واعمل براسُه ناعس، خلَّى الطير حتى قرَّب منه وهو ينقز عليه ودارُه ف فمُّه. غوَّت الطير وقال للثعبان "علاش بلعتني بريشي واش ما خفتيش ريشي يوحل لك فالحلق و تجيف آ مولاي الثعبان ؟" . قال له الثعبان " واش بغيتِني نعمل ؟".
_ حل فمّك آ مولاي الثعبان وصوت حتى يطير ريشي وذِك الساعه كولني ف راحتك.
حل الثعبان فمه باش يصوت ، تَيطير الطير وتَيحط على راس واحد الشجرَه وبقى يفدفد جنيحاتُه وهو تَيضحك على الثعبان. أما الثعبان بقى غير تَيشوف فالطير وعرفُه فايت التطويرَه الهيه.
إدريس أمغار مسناوي
تيفلت " تاعروروت "