زيارة ف المنام

زارتني جداتي ف لمنام
اللي توفات هادي اعوام
قالت لي احكي على حالكم
وحالت هاد ليام
جاوبيني وصدقي ف لكلام
كولي كلشي بالتمام
كلت لها، مهما قلت ما نوف حق لكلام
ايامنا ايام
اكثر فيها لخصام
وقل فيها بزاف صلة الأرحام
غاب فيها الود والوئام
غاب فيها السلام
ملي غبتوا غابت
معاكم الفرحة والابتسام
ما ابقات عشرة ما ابقى احترام
ما ابقى إحساس بين الناس
ادخلهم الطمع والوسواس
ابغاوا إيوصلوا للقمة بلا ما يبنيوا الساس
اتلف ليهم الري ما ابق اشوار
ما ابقات عفة ما ابق وقار
من حر الطموح لبعيد ولقهر
الشبان ارماوا راسهم ف لبحر
كل يوم تشوف منظر
منظر ما يعجب ولا يسر
أما إلى اقبطت جريدة وفيها تنظر
قلبك ينفطر
ما كاين غير اللي يعكر ليك البال والخاطر
ويخليك النهار كله تتسائل
على السبب وشنه الحل
ما تلق بداية ولا نهاية للحبل
الحصيل أو ما فيه
كثير ما يتقال
في حياتنا اللي لحمل فيها تقال
وكل شيء جميل غادي للزوال
جاوبتني جداتي بكلام العقال
حالكم ما يشبه لحوال
والله يعينكم على هاذ ليام
حتى تمروا منها بسلام
والله يقويكم يا اولاد حوا وآدام.