المغادرة الطوعية

قال ليك ابغاوا إيعملوا فيا امزيا
اعطاوني زوج فرانك
و زعموني على المغادرة الطوعية
وقال ليك بيهم انشارك ف التنمية
وهما ما يخلصوا حتى الدين اللي اعليا
عمرت المطبوع وغمضت عينيا
بلا ما انشاور بلا ما نرد عقلي ليا
بلا ما انفكر في اللي جاي
والضروف اللي اتفرضات اعليا
كل نهار زيادة خلاوني نفكر غير ف المناضا
وعلى ضيق الحال اللي بيه امحاوطا
هما خفوا عليهم لحمل
وأنا مرمدوني في لوحل
ومع الزمان بقيت حاصل
اعملتها بيديا
واخا نبكي وانزيد نبكي
ما كاين اللي حس بيا
حتى احبابي واصحابي
ما ابقاوا إدقوا الباب ويسولوا فيا
حيت ابغاوا يتسلفوا
وما صدقوا أن لفلوس ما بقات ليا
واللي كنت نقضي معاهم وقت الراحة
ما بقيت انشوفهم حيت ما بقات فيا مصلحة
جلست في الدار ولبست تزارة
كأني عمري ما كنت في الإدارة
النهار عليا يطوال وكلبي فيه امرارة
الراجل يخرج ولولاد يمشيوا للمدرسة
وانا نكمل الشقا أو نجلس انفكر غير ف لخسارة
جيبي خاوي والراجل جامع وطاوي
الله يخليها مغادرة
خلاتني في أمري محتارة
لكريدي عند الخضارة والكزارة
مكملة الشهر غير بلحزارة.

الاخت فاتحة الدرابي
شكرا للمغادرة الطوعية التي كشفت لنا عن شاعرة آتية لا محالة
يكفيك ان تستمري في النبش و الهبش عن الصور الشعرية الجميلة وانا متيقن من انك ستطرزين لنا اجمل القصائد .فشمري عن مخيالك ولغتك واكتبي ثم اكتبي
الميلودي العياشي