جرح المحنة

جرح المحنى


اه من جرح المحنى ياحنة

خندف جرات جراحو ففنا

كيف الطير طار ما غنى

ريشو عزايا ورجوعو منى

خلا لحزان ف لعماق رنى


ندبت الندابة وناحت لفراح

غزلو لمحاين من صوف لقراح

گعدو المنجج بكى وطاح

الدراز سمح فيامو وناح

طواو جناحو مدوه على لمراح

بقى صياحو بين دواحو راح

قرشالو ركنوه ظنوه سفاح

والمشط علقوه سال همو ساح

السدى صدى بطيب زمانو فاح

واهي غدايدي

الدنيا مرا يالمغروم بغواها

بلعى من ﮔلوب مسقية من شقاها

وشحال من شقي عفر ونساها

عنيدة غير بغلة فرواها

حاكمة الدير وياويح من ركلاتو بحفاها


صاح المضيوم من قاع البير المهدوم

صياحو غيوم وزادو ريح وشوم

لا راحة فيوم و السعد سعدو مهموم

الجرح مسموم لافياق عندو ولا نوم


عوة الديب و صال لبس عبانة وسروال

دخل لقبيلة فديه فتيلة يداوي لهوال

جن مارد يمص الدم البارد يسلب لنجال

طمع فلكسيبة فقد الهيبة ضاق بيه الحال

شيبي نبت بكري خاف لا يشيب

ضاع مني فكري صرت غريب

جرح المحنى عكري حلف لا يغيب

كيف ندير لصبري حتى يصيب

ماقريت فزماني كلام اللوح

ولا علم غواني مجروح الروح

بقيت براني كاتم البوح

لافرح داني و لاراريت فدوح

لهم لقاني غادي مدبوح

يا زعير يالشاوية يادكالة ياگزولة

مضيو المناجل هدا عام السبولة

فرحت لفراح والﮔلوب محلولة

عليو النوادر والگيع محمولة

ﮔعدو لخزاين را الموسم كاين

طلت حنة من شرجم لمحاين

ولعود عطار ما حدو فاين

ماخلاوه يزيد والناس فيه تتساين

واهي غدايدي


حمل الواد يوم الخميس

حاش معاه شلى ايام شلى غيس

ياواقف فجنبو روم لهيه

حالو هدا فهوالو خليه

والواد سرو معاه غادي

ولمقصودو غادي ما تمنعو بوادي

من كل دوار دا حجرة

ومن كل عترة تمرة

ومن كل سويعة فترة

هديرو جرح المحنى

والمحنى فيا و فيك يا من بنفسو يتعنى

الدايرة تدورو الراس يدور ما هو كدية

والكدية تابتة صابرة لزمان الحضية

جرح المحنى خندف و سالت وعايعو

لا زمان رحيم اعطف ولا تقل سوايعو

عبدالرشيد عمهم