الشوفة

الشُّوفة
 
تَلْفَت الشُّوفة
 فخيال الوقت
والخيال حاير
...
الزمان مخوَّضْ
الخطوات مرْفُودة بالغِيسْ
الطريق كلها وْحَلْ
كْلَعْ رجلو من الوقت
نشف الزمان وسط الزَّحْمة
...
الشوفة يمكن مَخْطوفَة
ما تَدْرِيشْ
يمكن طلعلها الزعاف
تْغَطَّات بالشوق
حَلْفَات ما تشوف بعيون الضِّيق
...
الزمان يراودْ الوقت
والوقت حارَّة ..جَاتْ سيف كَيَقْطع ...
اللُّومة على ليام
اللِّي كارفة الوقت بهواها
نهار شاقي فالدنيا ..ما صاب خلاص
ليل مْكَحَّل بالسهير ..بالشْخِير ..
وبوغطاط عاصر على الخوت.
ليام تكشف السر ..
تْنْشَر العيب..
ما تعرف تستر
الفضيحة على اللَّي تلَّف لحساب
تجري المزغوبة بل شوار
تكفي العقل فالدنيا
تزلعات لفكار حَبَّات فرحبة الوقت
النهار باقي بالضو معمي
ماشاف ..
ما سمع ..
الليل مْحَيَّر ..جْدبتو بوحدها
السر مْخَيط الدروب ...
الظلمة تعمي القلوب ...
حْرَم الفكرة من الحلم ...
حْرَم العين من النوم ...
ولَّ لجفا رفيق ..صديق
تْلَّف الشوق فقلب المحبة
عْمَات الشوفة من طول الطريق
دارت عكاز ..تدك به على ظهر الزمان
تْحْفَر جنَابُو ..ترَشِّيه
وهي فيه تالفة من البَدْيَةْ ...
عبدالعالي الوالي 2013/11/15

[rtl] [/rtl]