الحديث والمغزل

لحديث ولمغزل

فْ راسي شلى فْكار
مْشربكة ومْخبلة
منين نبداها
كيف نقراها
برْولتها كلمة كلمة
نفشتها م لخرايف
فرشت حروفها فَ لقرداش
رطبها مزيان
ما بقات تْضر الراس
...
ونا نغزل فيها
فْلت لمغزل من يدي
تْكركبت لحروف
تْخبلت لَفْكار
دارت كُبة كبيرة
طْلع ليا زْعاف
عياوْ ليا لكتاف
قلبت على راس لخيط
لقيتُه تالف بين لخيوط
قاديت كبة جديدة
علَّمت الراس
باش
عقلي ما يتلف
خيطي ما يهرف
حرفي ما يكشف
...لمغزل يغزل
ولعقل شارد
مشى بعيد
وهو مني قريب
تاه ف دروب لحروف
يقلب عليها وهو ملهوف
استغفلتني الكبة
لبست احلامي
دارت منها سوالف مْسرسبة
ب ظفاير مْذهبة
ضْحَكت م لكبة
سميتها لونجة
غنيت ليها ونا نغزل
لونجة يا لونجة**
دلّي لي سالفك نطلع فيه**
دارت فْ يدي
نسمة حرير
تاه معاها عقلي لهبيل
....
غزلت لكثير
ما بقى غير لقليل
مع لحديث ولمغزل
الوقت طار
العقل حار
جمعت حروفي
لبستها كلام
ب هذوب منوعة
ومعاني مرصعة
شفت راسي
فَ مراية ليام
ما قدرت نزيد لقدام
نشمر لكْمام
ثقالو لي لكْدام
بسباب الزحام
فين وفين
باش احلامي تبان
تظهر للعيان
ونكُول:
شوفوغزيلي
شحال مزيان

نجاة احسايني س/أ/غ 5/12/2013