قصيدة بعنوان: يَا الْهَايَمْ فِيقْ
نُوضْ شُوفْ طْيُورْ مْجَمْعَا
سارْحا مَامْسَوْقَا والسْمَا مْغَمْمَا
نوض شوف طيور مْجَمْعَا هَايْمَا
وَاكْلاَ، شَارْبَا، مَامْفَكْرَا مَامْخَمْمَا
نوض شوف طْيورْ العَزْ
فَالسْمَا طَايْرَا ...
خَلاَّتْ لَهْمُومْ فْلَرْضْ وْحَلْقاَتْ ...
حَلْقَاتْ بْعِيدْ ... بْعِيدْ ... وَبْنَادَمْ لاَهِي ...
الْـلِّـِي بْغَا مْهَابْتُو يْحَلَّقْ بْعِيدْ ...
ما بْقاَتْ شَفَقَا ... مَا بْقَاتْ رَحْمَا ...
مْرَوْنَا لاَ نَاهِي لاَ مُنْتَاهِي ...
هَذِي الدَّنْيَا الْيَوْمْ وَلاَّتْ مْفَحْمَا ...
هَذَا يَضْرَبْ ... هَذَا يْزِيدْ ...
قْلُوبْ عَامْرَا غْدَرْ تْقُولْ مْفَهْمَا
وَقْـلُوبْ عَامْرَا حْـقَـدْ مَا تَسْقِيكْ مَـــلْـمَا ...
يَا الْهاَيَمْ فِـيقْ ...
فِـيقْ رَاكْ غَادِي تَايَهْ سَارَحْ ...
ناسْ مْشَاوْ وَصْلُوا ...
وْناَسْ نَايْمَا ...
يا الهايم فيق... وَفْحَالَكْ خَمَّم ْ...
شَدْ اطْريقْ مَزْيانْ ،
الدَّنْيَا مَا دايْمَا ...
يا الهايم فيق لا يْحَرْقُوكْ لَعْوَافِ ...
صَفِّ وَشْرَبْ لاَ تْكُولْ كَافِ ...
شوف طيورْ العَزْ...
فالسَّمَا طايْرا ...
لا تَبْقَ كَالسْ وعْيونَكْ حَايْرَا ...
اخْدَمْ ... اقْـرَا ... اتْـعَلَّم ْ...
شَدْ اطْريقْ مَزيَانْ ...
الدَّنْيَا مَا دَايْمَا ...
= بقلم : حسن لعتيك ماء العينين =