مَخْزَنْ جَايِرْ وُلاَرْعِيَّة فَاسْدَة

مَخْزَنْ جَايِرْ وُلاَرْعِيَّة فَاسْدَة

******************
مَابْقَا مَخْزَنْ كَيَْخْلَعْ
وْمَابْقَا بْنَادَمْ كَ يََْجَْزَعْ
كِي لََمْزَغَّبْ كِيفْ اللِّي قْرَعْ
لْقَرْقُوبِي بَ الطَّابَعْ
وُنْوَاعْ السَّمْ كَ تَتْوََزَّعْ
فْ اللِّيسِيَّاتْ وُفْ الجَّامَعْ
لاَ نَاهِي لاَ مَنْ يَرْدَعْ
لْمَخْزَنْ تْوَارَا وُتْرَاجَعْ
كَثْرَتْ لَقْتِيلَة وُالسَّرْقَة
وْشَاعْ لَفْسَادْْ فْ الزَّنْقَة
قَاضِي يَحْكَمْ
قاضِي يََشْفََعْ
دََسْتُورْنَا صْبَحْ مْرَقَّعْ
مَقْيُوسْ مْيَدََّمْ وُمْبَرْقَعْ
مَابْقَا مَخْزَنْ كَيَْخْلَعْ
لْمَخْزَنْ تْوَارَا وُتْرَاجَعْ
خَلاَّ السِّيبَة فَلْ مُجْتَمَعْ
هََا اللِّي مْشََرْذَلْ
هَا اللِّي مْقَطَّعْ
وُاللِّي فْدَارُُُو تَاهُو مْرُوَّعْ
گَالُو لْحُقُوقْ مَكَايِنْ قَمْعْ
قِيلُو عْلِيكُومْ غِي الْمُقَدَّسْ
اللِّي قَرَّبْلُو يَتَّحْبَسْ
فِينْ مْشِيتِي يَا لاَمَانْ
فِينْ وَارَاوَكْ لْعُدْيَانْ
وْرَا لْحُقُوقْ كْلاَوْ رَمْضَانْ
نَشْرُو الرَّذَايِلْ بْ لْبَيَانْ
وُُالذَّعََارَة فِي كُلْ مْكَانْ
هَاذِي عُقُوقْ مَاشِي حُقُُوقْ
غَضَبْ اللهْ نَازَلْ مَ لْفُوقْ
بْنََادَمْ خْيَابْ خَصُّو لَحْكَامْ
قَتَّالْ لَرْوَاحْ خَصُّو إِعْدَامْ
وُالزَّانِي لاَبُدّْ يُرْجَمْ
السَّّارَقْ يَدُّو تَّفْصَمْ
يْْلاَ بْغِيتٌو لْعِيشَة بَالسِّلمْ
وُبْلاَدْنَا تْزِيدْ لْقُدَّامْ
فِحْكَامْكُومْ طَبّّْقُُو الشّْرَعْ
هَاذْ الشِّي وُلاَّ يَخْلَعْ
الْجَرِيمَة عَايِنْ بَايِِنْ
فِينَاهُوَّ حَقَّ لْ إِنْسَانْ ؟
فَلْ مَعِيشَة بَأَمْنْ وْأَمَانْ
يَامَخْزَنْ جْمَعْ رَاسَكْ
نَقِّي لَبْلاَدْ ضْبَطْ لْوَضْعْ
السِّيبَة فيهَا دَارَتْ گْرُونْ
لْمُوَاطِنْ ضْحَا مَرْهُونْ
لِ الشَّفَّارَة وُلْمُجْرِمِينْ
لَ الشَّمْكَارَة وُقْلاَلْ الدِّينْ
لْْكُلْ قَتَّالْ وْكُلّْ صْگَعْ
اللِّي مْقَرْقَبْ وُاللِّي مْضَبَّعْ
وُاللِّي فَ خْوَانُو كَيْقَطَّعْ
يَا بُُولِيسْ مَالَكْ مَخْلُوعْ
يَاكْ انْتَ أَجْرَكْ مَدْفُوعْ
مَنْ مَالْ الشَّعْبْ كَيَْتَّجْمَعْ
غِي بَاشْ تَخْدَمْ لْمُجْتَمَعْ
وْيَاقَاضِي شَدَّدْ لَحْكَامْ
عْلَى اللِّي احْتَرَفْ لْ إِجْرَامْ
نََاسْ زْمَانْ خَلاَّوْ فَايْدَة
نَطْقُوبِيهَا نَاسْ بْصَايَرْ
مَخْزَنْ جَايِرْ وُلاَرْعِيَّة فَاسْدَة
يَامَخْزَنْ صْغَا وُسْمَعْ
نُوضْ تْحَرَّكْ لاَ تَقْبَعْ
المريني ادريس
القصر الكبير بتاريخ : 06 / 11 / 2012